Foto: nato
Ky artikull u botua për herë të parë nga Vërtetmatës-i (Maqedonia e Veriut), në kuadër të projektit “Qendra kundër dezinformatave në Ballkanin Perëndimor: ekspozimi i ndikimeve të rrezikshme përmes gazetarisë mbikëqyrëse”.
Mbrojtjet ajrore polake dhe ato aleate janë vendosur për të siguruar hapësirën ajrore të vendit, pasi Rusia ka filluar sulme të reja ajrore vdekjeprurëse kundër Ukrainës fqinje. NATO është një aleancë mbrojtëse dhe për këtë arsye po i forcon patrullimet ajrore në rajon si përgjigje ndaj shkeljeve të dyshimta ruse të hapësirës ajrore dhe shfaqjes së dronëve në disa vende anëtare. Këto masa janë me natyrë parandaluese dhe synojnë sigurimin e hapësirës ajrore dhe mbrojtjen e qytetarëve, veçanërisht në zonat që ndodhen në afërsi të menjëhershme të rajonit të rrezikuar
TË MOS LEJOJMË QË NEOFASHISTËT E NATO-s TË NA FUTIN NË LUFTË ME RUSINË!!!
Kur i dëgjoj neofashistët:
Donald Tusk, Ursula von der Leyen, Emmanuel Macron, Keir Starmer, Mark Rutte, Friedrich Merz, Boris Pistorius (ministri gjerman i mbrojtjes), Kaja Kallas, Annalena Baerbock, gjeneralët amerikanë, Johann Wadephul (ministri gjerman i punëve të jashtme) dhe shumë, shumë idiotë të tjerë, kam përshtypjen se të gjithë kanë trashëguar skizofreninë e Hitlerit dhe se nga historia nuk kanë asnjë njohuri dhe nuk kanë mësuar asgjë!!!Mos besoni në gënjeshtrat e neofashistëve perëndimorë se Rusia do ta sulmojë Poloninë dhe do të marshojë deri në Varshavë.
Mos besoni në gënjeshtrat e të lartpërmendurve se Rusia do t’i sulmojë vendet baltike, Finlandën dhe anëtarët e tjerë të NATO-s dhe përmes Polonisë e Ukrainës do të arrijë deri në Berlin. Mendjet që bëjnë një propagandë të tillë janë të kontaminuara me ideologji fashiste!!!
Rusisë nuk i duhet as më shumë hapësirë për të jetuar, as më shumë burime!!! Rusia dëshiron paqe dhe kufij të sigurt, pa fashistë!!!
Nuk është e vërtetë pohimi në postimin që po recensojmë, se politikanët evropianë të përmendur në të janë “neofashistë”. Edhe në të kaluarën, “Vërtetmatësi” ka recensuar narrativa të ngjashme, në të cilat politikanët evropianë janë shpifur pa bazë duke u quajtur “fashistë”, përmes dezinformatave.
Vetë koncepti i funksionimit dhe themelet e Bashkimit Evropian janë antifashiste, dhe BE-ja ndan vlerat antifashiste. Lufta e përbashkët kundër formave bashkëkohore të ideologjive ekstremiste dhe totalitare, përfshirë neonazizmin, mbetet një prioritet kyç i BE-së. Për më tepër, BE-ja qëndron fort kundër të gjitha formave të antisemitizmit, i cili është i papërputhshëm me vlerat dhe parimet themelore mbi të cilat është themeluar BE-ja. BE-ja dhe vendet e saj anëtare kanë ndërmarrë masa të gjera ligjore dhe politike për të luftuar aktet e racizmit, diskriminimit racor, ksenofobisë dhe intolerancës së lidhur me to.
Ekzistojnë dëshmi të qarta se BE-ja dhe vendet e saj anëtare funksionojnë në mënyrë të kundërt me parimet e fashizmit. Bashkimi Evropian është një bashkim politik dhe ekonomik i përbërë nga 27 vende anëtare që janë në thelb demokratike dhe që respektojnë parimet e demokracisë liberale, të drejtave të njeriut dhe sundimit të ligjit. BE-ja vendos theks të fortë mbi të drejtat e njeriut, liritë themelore dhe mbrojtjen e pakicave. Ajo ka mekanizma për të mbështetur këto parime, siç është Gjykata Evropiane për të Drejtat e Njeriut.
Ndryshe nga kjo, regjimet fashiste janë të njohura për natyrën e tyre shtypëse, përfshirë censurën, ndjekjen e kundërshtarëve politikë dhe shkeljen e të drejtave të njeriut. Bashkimi Evropian feston diversitetin kulturor dhe inkurajon bashkëpunimin midis popujve të ndryshëm. Ai synon të nxisë ndjenjën e identitetit evropian, duke respektuar njëkohësisht identitetet kombëtare.
Më 25.10.2018, Parlamenti Evropian shprehu shqetësim për rritjen e trendit të normalizimit të fashizmit, racizmit dhe ksenofobisë dhe u bëri thirrje të gjitha vendeve anëtare të Bashkimit Evropian që të ndalojnë grupet neofashiste dhe neonaziste. Nga kjo bëhet e qartë se angazhimet e Bashkimit Evropian jo vetëm që nuk janë fashiste, por janë të bazuara fort në politika, rekomandime dhe veprime antifashiste.
Gjithashtu, nuk është e vërtetë se NATO është një organizatë fashiste.
Fashizmi është një ideologji dhe lëvizje politike ekstremisht e djathtë, autoritare dhe ultranacionaliste, që karakterizohet nga një lider diktatorial, autokraci e centralizuar, militarizëm, shtypje e dhunshme e opozitës, besim në një hierarki të fortë shoqërore, nënshtrim i interesave individuale për të mirën e kombit ose racës, dhe kontroll i fortë mbi shoqërinë dhe ekonominë.
Nuk është e vërtetë as që vendet e NATO-s po e shtyjnë botën drejt një lufte me Rusinë. Siguria e Ukrainës ka një rëndësi të madhe për NATO-n dhe vendet e saj anëtare. Aleanca e mbështet plotësisht të drejtën natyrore të Ukrainës për vetëmbrojtje dhe të drejtën e saj për të zgjedhur marrëveshjet e veta të sigurisë. NATO e dënon në mënyrën më të ashpër të mundshme luftën agresive të Rusisë kundër Ukrainës. Ky agresion e minon seriozisht sigurinë euroatlantike dhe atë globale dhe përbën shkelje të qartë të së drejtës ndërkombëtare.
Aleatët e NATO-s, në përputhje me rezolutat përkatëse të Asamblesë së Përgjithshme të OKB-së, kërkojnë që Rusia menjëherë ta ndalojë luftën, të ndërpresë përdorimin e forcës kundër Ukrainës dhe të tërheqë plotësisht e pa kushte të gjitha trupat e saj nga Ukraina.
NATO nuk kërkon përballje dhe nuk përbën kërcënim për Rusinë. Aleanca do të vazhdojë t’u përgjigjet kërcënimeve dhe veprimeve ruse në mënyrë të bashkuar dhe të përgjegjshme. Ne po forcojmë kapacitetet tona të parandalimit dhe mbrojtjes, po i mbështesim partnerët tanë dhe po e rrisim qëndrueshmërinë tonë. Kjo përfshin dënimin e veprimeve të Rusisë dhe kundërshtimin e dezinformatave, thuhet në faqen zyrtare të NATO-s.
Mbrojtjet ajrore të Polonisë dhe aleatëve janë dislokuar për të siguruar hapësirën ajrore të vendit, pasi Rusia ka nisur sulme të reja ajrore vdekjeprurëse kundër Ukrainës fqinje. NATO është një aleancë mbrojtëse dhe për këtë arsye po i forcon patrullimet ajrore nëpër rajon, si përgjigje ndaj shkeljeve të dyshuara ruse të hapësirës ajrore dhe pranisë së dronëve në disa vende anëtare. Këto masa janë me karakter parandalues dhe synojnë sigurimin e hapësirës ajrore dhe mbrojtjen e qytetarëve, veçanërisht në zonat pranë rajonit të rrezikuar. Aeroportet në Gjermani, Danimarkë, Norvegji dhe Poloni gjithashtu së fundmi ndërprenë fluturimet për shkak të dronëve të paidentifikuar, ndërsa Rumania dhe Estonia kanë drejtuar gishtin nga Rusia, e cila i ka mohuar akuzat.
Prandaj, masat parandaluese mbrojtëse të NATO-s janë të arsyetuara dhe nuk përbëjnë “propagandë nga njerëz të ndotur me ideologji fashiste”. Veprimet agresive të Rusisë e minojnë sigurinë dhe stabilitetin ndërkombëtar. Përveç agresionit kundër Ukrainës, Rusia ka baza ushtarake dhe trupa në Gjeorgji dhe Moldavi pa pëlqimin e qeverive të këtyre vendeve. NATO nuk e sulmoi Gjeorgjinë në vitin 2008 — këtë e bëri Rusia. NATO nuk e sulmoi Ukrainën në vitin 2014 dhe përsëri në vitin 2022 — këtë e bëri Rusia.
Ishte Rusia ajo që e sulmoi Ukrainën me arsyetimin se po kryente “denazifikim” — një narrativë propagandistike që është demantuar.
Për të gjitha faktet e mësipërme, postimin që po recensojmë e vlerësojmë si të pavërtetë.
