Foto: nato

Ky artikull u botua për herë të parë nga Vërtetmatës-i (Maqedonia e Veriut), në kuadër të projektit “Qendra kundër dezinformatave në Ballkanin Perëndimor: ekspozimi i ndikimeve të rrezikshme përmes gazetarisë mbikëqyrëse”.

Bota perëndimore as nuk kërcënon dhe as nuk dëshiron luftë bërthamore, as nuk e provokon atë. Që nga fillimi i pushtimit ushtarak të Ukrainës nga Rusia, pala ruse ka bërë vazhdimisht kërcënime të tilla dhe retorikë bërthamore përmes udhëheqjes më të lartë shtetërore, gjë që është dënuar nga NATO dhe e ka bërë të qartë se lufta bërthamore është diçka që Perëndimi nuk e dëshiron.

Po shqyrtojmë një postim në rrjetin social Facebook që ndan një foto të Presidentit rus Vladimir Putin (me një kryq mbi të cilin shkruhet “a do të tërhiqen automatikisht vendet evropiane në një konflikt ushtarak me Rusinë”) dhe thotë:

Po të mos ishte Putini, deri tani bota do të ishte zhytur në një luftë bërthamore. Prej vitesh u shpjegon atlantistëve, si fëmijëve në kopsht, se nuk duhet të bëjnë atë që po bëjnë në dhe përmes Ukrainës kundër Rusisë. Çdo ditë, në takime, konferenca, deklarata – përsëri e përsëri – u “vizaton”, u shpjegon, u sqaron se kjo është një lojë në të cilën ata me siguri nuk do ta mundin Rusinë, por është sikur të flasësh me murin.

Nuk kam parë, vërtet nuk ka politikan si ai që përpiqet kaq me këmbëngulje ta shpëtojë botën nga një katastrofë. Por atlantistët vazhdojnë pa pushim sipas mendjes së tyre. Duket se megjithatë do të shkaktojnë një luftë bërthamore dhe nuk do të ketë më botë të cilën e duan aq shumë ta sundojnë plotësisht. Aq shumë sa janë gati ta shkrumbojnë.

Përkundër asaj që thuhet në postim, më 25 shtator 2024, “The Guardian” raportoi se Putini e kishte paralajmëruar Perëndimin se po mendonte të përdorte armë bërthamore.

Vladimir Putini e përshkallëzoi retorikën e tij bërthamore, duke i thënë një grupi zyrtarësh të lartë se Rusia do të merrte parasysh përdorimin e armëve bërthamore nëse do të sulmohej nga ndonjë shtet me armë konvencionale. Këto komente përbëjnë paralajmërimin më të fuqishëm të Rusisë kundër lejimit nga ana e Perëndimit që Ukraina të kryejë sulme të thella brenda territorit rus duke përdorur raketa perëndimore me rreze të gjatë. Putin tha se Rusia do të shqyrtojë përdorimin e armëve bërthamore nëse Moska merr “informacione të besueshme” për fillimin e një lëshimi masiv të raketave, avionëve apo dronëve kundër saj, shkruan “The Guardian”.

Perëndimi nuk kërcënon me armë bërthamore ndaj Rusisë, përkundër asaj që thuhet në postim.
Në faqen zyrtare të NATO-s, në pyetjen numër 12: “Cili është reagimi i NATO-s ndaj retorikës së rrezikshme të Rusisë rreth armëve bërthamore, kimike dhe biologjike?”, shkruan:

Retorika kërcënuese bërthamore e Rusisë është e rrezikshme dhe e papërgjegjshme. NATO i merr seriozisht këto kërcënime, por nuk do të frikësohet. NATO mbetet e përkushtuar dhe i dërgon një mesazh të qartë Rusisë se lufta bërthamore nuk mund të fitohet dhe nuk duhet të zhvillohet kurrë. Çdo përdorim i armëve bërthamore nga Rusia do të ndryshonte rrënjësisht natyrën e luftës dhe do të kishte pasoja të rënda për Rusinë. Për më tepër, partnerët e NATO-s janë thellësisht të shqetësuar për përdorimin e raportuar të armëve kimike nga Rusia kundër forcave ukrainase. Çdo përdorim i armëve kimike ose biologjike nga Rusia do të ishte një shkelje e së drejtës ndërkombëtare dhe një krim lufte dhe do të rezultonte në pasoja të rënda, thuhet në faqen e internetit të NATO-s. 

Në një brifing të dhjetorit 2024, vërehet retorika e intensifikuar e Rusisë me kërcënime bërthamore. Putini përdori gjithnjë e më shpesh kërcënimin me arsenalin bërthamor rus për të ushtruar presion mbi Perëndimin për mbështetjen ushtarake dhe diplomatike ndaj Ukrainës pas pushtimit ushtarak rus të vitit 2022. Si pjesë e fushatës së tij të presionit bërthamor, Rusia vendosi armët bërthamore në gjendje më të lartë gatishmërie, testoi kapacitete të reja bërthamore, kërcënoi se do të rifillojë testimet bërthamore dhe pezulloi pjesëmarrjen në një marrëveshje kyçe me SHBA-në.

Në mars 2023, Rusia njoftoi se do të dërgojë armë bërthamore taktike në Bjellorusi. Kjo është hera e parë që Rusia e bën një gjë të tillë jashtë territorit të saj që nga shpërbërja e Bashkimit Sovjetik. Në nëntor 2024, Putini gjithashtu miratoi ndryshimin e doktrinës bërthamore të Rusisë – një veprim që, sipas shumë ekspertëve, nënkupton uljen e pragut për përdorimin e armëve bërthamore.

Anëtarët e G7, përfshirë fuqitë bërthamore si Franca, Shtetet e Bashkuara dhe Mbretëria e Bashkuar, e quajtën pozicionimin bërthamor të Rusisë të papërgjegjshëm dhe të papranueshëm. Në qershor 2023, ish-sekretari i përgjithshëm i NATO-s, Jens Stoltenberg, e dënoi retorikën bërthamore të pamëshirshme të Rusisë.

Presidenti Putin, ministri i jashtëm Sergei Lavrov dhe Dmitry Medvedev shpesh i referohen arsenaleve bërthamore të Rusisë në kontekstin e luftës në Ukrainë. Në vitin 2022, Putini paralajmëroi kundër çdo ndërhyrjeje të jashtme në Ukrainë apo sulmi të drejtpërdrejtë ndaj Rusisë, duke deklaruar se Rusia do të përgjigjet menjëherë dhe “pasojat do të jenë të tilla që nuk i keni parë kurrë më parë në gjithë historinë tuaj”.

Më 27 shkurt 2022, Putini urdhëroi që forcat bërthamore ruse të kalojnë në një gjendje më të lartë gatishmërie. Ai deklaroi se e lëshoi këtë urdhër si përgjigje ndaj sanksioneve ekonomike gjithnjë e më të ashpra dhe “deklaratave agresive” nga Perëndimi pas pushtimit rus të Ukrainës.

Më 20 prill 2022, Rusia testoi raketat balistike ndërkontinentale “Sarmat”.
Më 12 maj, Medvedev tha se mbështetja dhe ndihma e NATO-s për Ukrainën përbën rrezik për një konflikt me Rusinë dhe një “luftë bërthamore të plotë”.

Shumë kërcënime të tjera mund të lexohen në faqen 5 të brifingut.

Për shkak të të gjitha fakteve të përmendura më lart, postimi që po recensojmë e vlerësojmë si të pavërtetë. Bota Perëndimore as nuk kërcënon, as nuk dëshiron luftë bërthamore, e as nuk e provokon atë. Që nga fillimi i agresionit ushtarak të Rusisë kundër Ukrainës, pala ruse, në disa raste, përmes udhëheqjes më të lartë shtetërore, ka bërë kërcënime të tilla dhe ka përdorur retorikë bërthamore, e cila është dënuar nga NATO. Ajo ka bërë të qartë se lufta bërthamore është diçka që Perëndimi nuk e dëshiron.