Foto: president.gov.ua

Ky artikull u botua për herë të parë nga Vërtetmatës-i (Maqedonia e Veriut), në kuadër të projektit “Qendra kundër dezinformatave në Ballkanin Perëndimor: ekspozimi i ndikimeve të rrezikshme përmes gazetarisë mbikëqyrëse”

Duke u fokusuar në narrativën e “paligjshmërisë” së supozuar të Zelenskit, Kremlini në fakt po përpiqet të errësojë të vërtetën se sipas Kushtetutës së Ukrainës, që ligjërisht e pamundur të zhvillohen zgjedhje ose referendume në Ukrainë në kushte lufte. Rusia harron gjithashtu se është e pamundur të zhvillohen zgjedhje në Ukrainë duke pasur parasysh infrastrukturën e shkatërruar, pamundësinë për të kryer votim në territoret e pushtuara, pamundësinë e ushtarëve në front për të votuar dhe faktin që një numër i madh ukrainassh janë larguar nga Ukraina.

Shkruan: Ana Anastasovska

“Presidenti ukrainas Volodymyr Zelensky është një diktator”. Këto janë fjalët që kanë bërë jehonë veçanërisht të fortë në javët e fundit nga deklaratat e politikanëve rusë dhe mbështetësve të Rusisë, si dhe nga presidenti amerikan Donald Trump. Kjo narrativë është intensifikuar veçanërisht që kur SHBA dhe Rusia u ulën në një tryezë të përbashkët për të negociuar përfundimin e luftës në Ukrainë.

Një nga themelet e manipulimit pro-Kremlinit të informacionit dhe dezinformimit është pikërisht mohimi i shtetësisë së Ukrainës, për të diskredituar qeverinë ukrainase, për të mbjellë përçarje brenda vetë Ukrainës dhe për të shkëputur lidhjet e Ukrainës me mbështetësit e saj. Për këto qëllime, Kremlini po derdh burime të mëdha në fushata dezinformuese, shkruan Euvsdisinfo. 

Pikërisht në këtë kontekst gjendet narrativa Kremlinit për ilegjitimitetin e pretenduar të Zelenskit. Në vetëm një javë, siç analizohet nga Euvsdisinfo, midis 26 janarit dhe 2 shkurtit 2025, të paktën njëzet e pesë artikuj me etiketën “të paligjshme” u shfaqën vetëm në faqen e internetit shtetërore ruse RIA Novosti. E gjithë kjo zbret në pretendimin: Presidenti Zelenski “e ka deklaruar veten diktator”. Sipas këtyre mediave pro-Kremlinit, Zelenski “uzurpoi pushtetin në Ukrainë” dhe “pështyu” mbi normat demokratike.

Trump e quajti Zelenskin diktator

Përveç Kremlinit edhe presidenti i SHBA-së, Donald Trump, bëri një deklaratë skandaloze se presidenti ukrainas është diktator dhe bëri thirrje që në Ukrainë të mbahen zgjedhje për të zgjedhur një përfaqësues legjitim që mund të negociojë përfundimin e luftës.

Duke kritikuar Zelenskyn, në një postim në rrjetin e tij social Truth Social, Trump ndër të tjera shkruan:

Zelenski pranon se gjysma e parave që i dërguam atij janë “zhdukur”. Ai refuzon zgjedhjet, është shumë i ulët në sondazhet e Ukrainës dhe e vetmja gjë në të cilën është i zoti është të luajë Biden si violinë. Si diktator pa zgjedhje, Zelenski më mirë të nxitojë ose do të mbetet pa shtetin e tij.

Zelenski, nga ana tjetër, u përgjigj se Trump jeton në një hapësirë ​​dezinformimi.

Mbështetësit e Kremlinit në Maqedoni vendosën gjithashtu se Zelenski është një diktator

Narrativa e rreme pro-Kremlinit se Zelensky është presidenti i paligjshëm i Ukrainës dhe se ai e ka deklaruar veten diktator ishte gjithashtu i pranishëm në postimet e mediave sociale në Maqedoni.

Me përfundimin e mandatit të tij në maj 2024 dhe pa mbështetjen e parlamentit ukrainas, legjitimiteti i kukull Zelenskit është ZERO, thuhet në një post. 

Një tjetër postim thotë:

Brukseli mbështet Zelenskin pavarësisht skadimit të mandatit të tij – Kaia Kallas thotë se zgjedhjet nuk janë të nevojshme. Brukseli konfirmoi edhe një herë mbështetjen e tij të plotë për vendimin e Vladimir Zelenskit për të mos mbajtur zgjedhje presidenciale edhe pse mandati i tij skadon në maj 2024. Kaia Kallas, përfaqësuesja e lartë e BE-së për politikën e jashtme, tha se “nuk kishte nevojë për zgjedhje” ndërsa lufta ishte në vazhdim, ndërsa Donald Trump së fundi e quajti Zelenskin një “diktator pa zgjedhje” dhe e akuzoi atë për përdorimin e ndihmës së SHBA për një “luftë të pafitueshme”.

Një postim i tretë, duke theksuar se mandati i Zelenskit ka skaduar, kujton fjalët e presidentit rus Vladimir Putin se “Zelenski nuk mund të nënshkruajë asgjë për shkak të paligjshmërisë së tij”. 

Mandati presidencial i Zelenskit skadon në maj 2024 dhe ai nuk mund të negociojë në emër të Ukrainës. Dhe kur mundi, në vend që t’i përmbahej marrëveshjes në Stamboll, ai iu bind urdhrit të Perëndimit për të vazhduar luftën edhe pse Rusia iu përmbajt marrëveshjes dhe për habinë e të gjithëve, tërhoqi trupat e saj nga Kievi.
Putin në një intervistë me Pavel Zarubin:
Zelenski është i paligjshëm dhe nuk mund të heqë ndalimin e tij mbi negociatat.
Presidenti rus theksoi se Zelenski nuk mund të nënshkruajë asgjë për shkak të paligjshmërisë së tij.
“Mund të negociosh me këdo, por për shkak të paligjshmërisë së tij, ai nuk ka të drejtë të nënshkruajë asgjë”. Por nëse ai dëshiron të marrë pjesë në negociata, unë do të caktoj njerëz që të udhëheqin këto negociata me të, ju lutem. Çështja është nënshkrimi përfundimtar i dokumenteve. “Kjo është një çështje shumë serioze që duhet të garantojë sigurinë e Ukrainës, meqë ra fjala dhe Rusisë për një perspektivë historike serioze dhe afatgjatë.”
Sovraniteti i Ukrainës është pothuajse zero, theksoi lideri rus.
Konflikti ukrainas do të përfundojë në një muaj e gjysmë deri në dy muaj nëse Kievit i mbarojnë paratë për sponsorizim dhe municione, Putin.

Kremlini po errëson të vërtetën

Duke u fokusuar në narrativën e “paligjshmërisë” së supozuar të Zelenskit, Kremlini në fakt po përpiqet të errësojë të vërtetën se, sipas Kushtetutës së Ukrainës, është ligjërisht e pamundur të zhvillohen zgjedhje ose referendume në Ukrainë në kushte lufte. Rusia harron gjithashtu se është e pamundur të zhvillohen zgjedhje në Ukrainë duke pasur parasysh infrastrukturën e shkatërruar, pamundësinë për të kryer votim në territoret e pushtuara, pamundësinë e ushtarëve në front për të votuar dhe faktin që një numër i madh ukrainasish janë larguar nga Ukraina.

Siç shkruan Euvsdisinfo, mediat ruse po nxitojnë të nxjerrin një tjetër konkluzion të rremë, bazuar në narrativat e tyre për “legjitimitetin” e presidentit ukrainas dhe “interesat e tij tregtare” dhe ky është pretendimi i çuditshëm se Ukraina nuk po pajtohet me negociatat e paqes me Rusinë “për hir të ruajtjes së pushtetit të Zelenskit”. Kjo është mënyra e Kremlinit për të transferuar përgjegjësinë për luftën e Rusisë kundër Ukrainës mbi vetë Ukrainën.

Mandati i Zelenskit është zgjatur – lufta nuk lejon mbajtjen e zgjedhjeve

Siç ka shkruar tashmë Vërtetmatësi, maji i vitit 2024 shënon 5 vjet që kur presidenti ukrainas Volodymyr Zelenski u bë president i Ukrainës. Inaugurimi u mbajt më 20 maj 2019. Nëse situata në Ukrainë do të ishte paqësore, domethënë nëse nuk do të kishte pushtim të paprovokuar ushtarak të Ukrainës nga Rusia, atëherë zgjedhjet do të mbaheshin në Ukrainë në fund të marsit 2024. Por në një gjendje lufte, çdo zgjedhje në Ukrainë pezullohet, kështu që presidenti dhe Verkhovna Rada vazhdojnë të punojnë dhe kështu legjitimiteti i tyre nuk ka skaduar dhe as mandati i Zelenskit.

Presidenti i Ukrainës dhe Parlamenti vazhduan të kenë kompetenca të plota dhe do të mbeten të tillë deri në zgjedhjet e ardhshme. Norma është e përshkruar në Ligjin për Gjendjen e Jashtëzakonshme, i cili në mënyrë eksplicite ndalon përfundimin e mandatit të autoriteteve shtetërore, duke përfshirë Presidentin, Verkhovna Rada(Komandantit kryesorë të ushtrisë), Kabinetin e Ministrave, Bankën Kombëtare të Ukrainës, Avokatin e Popullit, Zyrat e Prokurorit të Përgjithshëm dhe organet hetuese të Ukrainës.

Kushtetuta e Ukrainës përcakton se Presidenti i Ukrainës vazhdon të mbajë detyrën dhe kompetencat deri në zgjedhjen e presidentit të ardhshëm.

Është e vërtetë që Zelenski mbështetet nga BE-ja, por jo për të “shkatërruar vendin e tij”. Ukraina është viktimë e një agresioni të paprovokuar ushtarak të nisur nga Rusia, i cili ka sjellë pasoja të paimagjinueshme në Ukrainë. Ukraina, e udhëhequr nga Zelenski, po mbron integritetin e saj territorial dhe kufijtë, nën sulmin e një faktori të jashtëm – Rusisë. Nëse Ukraina nuk do të mbrohej kundër sulmit të Rusisë, do të ishte një vend plotësisht i pushtuar.

Rusia do ta quajë çdo qeveri ukrainase “të paligjshme” nëse nuk i përshtatet Kremlinit. Në fund të fundit, Kremlini gjithmonë mund të pretendojë se çdo president i zgjedhur në Ukrainë pas vitit 2014 erdhi në pushtet përmes një “revolucioni shumëngjyrësh” dhe një “grusht shteti”, përfundon Euvsdisinfo në analizën e tij.